Kuido poliklíniko

Mi mester di kuido i ke keda biba na kas.

Poliklínika di Klínika Capriles ta brinda yudansa ambulante na adulto i mayornan di edat ku diverso problema sikiátriko i pasado. Bo por keda biba na kas i ta bin poloklínika pa bo tratamentunan. Nos kuido ta na alkanse di tur i fásilmente aksesibel. Komo adulto i hóben bo por akudí na un terapista ora bo tin keho di:

  • Burn-out
  • Kehonan di no por mira lus riba bo kaminda
  • Depreshon
  • Miedu i ansha
  • Problema ku drumimentu
  • Kehonan di tenshon
  • Aktuashon kompulsivo òf pensamentunan ku ta keda bin bèk
  • ADHD òf otro keho relashoná ku atenshon
  • Problemanan di komementu

Kon e ta funshoná?

Tur hende por dat den situashon den bida, pasa dor di kos ku ta saka bo kompletamente for di balans. Ta importante pa no keda kana muchu largu ku e sintimentunan ei. Bo so no ta sali afó? Klínika Capriles ta ofresé tratamentu, guia i kuido. Hopi bia un par di kombersashon ku un dunadó di yudansa profeshonal por yuda pa haña un ekilibrio nobo, un balans nobo. Pa tur kliente ta konta ku nan ta pasa dor di un proseso ku algun paso. Promé bo ta buska un karta di referensia, djei bo ta registrá I seguidamente bo ta bai bo promé kombersashon, e intake. Despues di esei ta traha un plan di tratamentu, pa dje e tratamentu kuminsá. Al final e meta ta rekuperashon i kaba bo tratamentu.

Pidi referensia.

Pa bo promé bishita na poliklínika, bo mester di un karta di referensia di bo dòkter di kas. Ta posibel tambe pa pidi un referensia pa un otro persona si kisas bo tin preokupashon pa ku miembro di famia òf un persona yegá na bo.

Gastunan

Kuido di salú mental ta pa gran parti kubrí den e pakete básiko di SVB.
Si pa un motibu òf otro bo no por kubri e gastunan bo mes, ta buska un manera pa regla esaki, por ehèmpel via di Kas di Bario.
Tambe bo por sera un seguro privá ku ta kubri e gastunan. Tin trahadónan sosial ku por yuda bo regla esaki.

Kon mi ta traha un sita?

Si bo ta sigurá na SVB, bo por traha un sita na bali di Poliklínika. Si bo ta segurá privá òf ke paga kèsh, bo por yama pa un sita: +5999 737 4022. Por fabor tene siguiente dato na man:

  • Nòmber, adrès, number di telefòn, mailadrès
  • Fecha di nasementu
  • Number di SVB òf number di registrashon di bo seguro pa gastu di malesa

Pa na momentu di registrá òf e promé sita na klínika, trese:

  • Identifikashon bálido (sédula òf pasport)
  • Prueba di SVB òf Seguro privá
  • Karta di referensia di dòkter di kas

Mi por kanselá un sita?

Si, esei por, pero mihó ta pa posponé un sita si no por otro. Den kaso ku no kanselá un sita di mas tardá 24 ora promé ku e sita tin ku tuma lugá, ta kobra esaki.

Kiko e promé sita ta enserá?

  • Ta yama bo mas pronto posibel pa un intake. Bo por bin ku 1 miembro di famia òf amistat komo sosten.
  • Durante e intake bo ta deliberá ku e dunadó di tratamentu kiko ta pasando. E dunadó di tratamentu ta skucha i ta hasi pregunta. Abo (òf bo famia/persona mas yegá) ta frekuentemente tristu òf anshá? Bo tin molèster di no por drumi òf bo ta wòri hopi? Strès ta kansa bo òf bo ta lubidá hopi? Molèster di pániko òf káos den bo kabes? Ki keho físiko tin? Tin preokupashon finansiero? Kon bo ta dil ku esei na e momentu akí? Bo trese anotashon.
  • Huntu ku e dunadó di tratamentu bo ta yega na un plan di tratamentu. Den e plan akí boso ta stipulá kiko lo ta meta, karákter i durashon di e tratamentu. Si ta nesesario por ahustá e plan aki segun e tratamentu ta kana.
  • Durante e intake ta wak tambe si Klínika Capriles ta e lugá adekuá pa bo. Por ta tin un otro institushon ku ta kuadra mihó ku bo pedido di yudansa.

Kiko ta sosodé durante un tratamentu?

Huntu ku bo dunadó di tratamentu bo ta traha un plan di tratamentu. E plan ta kontené e palabrashonnan ku bo ta hasi tokante bo tratamentu. Esaki bo ta hasi huntu ku bo dunadó di tratamentu I ku bo permit ta enbolbí bo famia tambe. Pa por traha un plan, abo i bo dunadó di tratamentu mester yega na un akuerdo tokante kiko ta e kehonan. Tin bia mester di saminashonnan pa yega na un diagnosis (temporal). Ta importante ku boso ta di akuerdo ku otro tokante kiko ta e motibunan di bo kehonan.

Despues ta determiná huntu kiko ta e metanan ku bo ke logra i di ki manera bo dunadó di tratamentu i abo ta bai realisá esaki. Tambe bo ta palabra na ki momentu i kon ta finalisá bo tratamentu. Esaki ta importante, pa asina e espektativanan no ta muchu haltu ni muchu abou. Abo ta kere ku mester di 10 kombersashon, i bo dunadó di tratamentu ta kere ku mester di 20. Parti di e plan di tratamentu por ta por ehèmpel: terapia individual I den grupo, den kombinashon ku terapia di músika. Ta basta difísil pa kambia bo estilo di bida, bo pensamentunan òf bo komportashon. E por kosta bo kisas un ratu I 1 aña ta parse kisas largu, pero ta kos ku bo por tin benifisio di dje pa bida largu.

E plan akí mester ta ofisialmente akordá dor di abo i bo dunadó di tratamentu promé ku bo tratamentu kuminsá.

Ta evaluá e tratamentu ku regularidat. Durante e evaluashonnan bo ta deliberá ku bo dunadó di tratamentu i otronan kon e tratamentu ta kanando. Si mester di ahuste di metanan, ta traha hun plan di tratamentu nobo.

Klínika Capriles ta ofresé diferente forma di yudansa na sitionan na Kòrsou, pa abo i hendenan den bo ambiente. Nos ta duna tratamentu online, ta risibí bo pa sita na un di nos sitionan, ta bini kas serka bo òf ta ofresé un atmishon temporal si ta nesesario.

Ki ora mi tratamentu ta kla?

Den kurso di tempu ta deliberá riba inisiativa di bo dunadó di tratamentu òf riba bo propio inisiativa na ki momentu por terminá e tratamentu. Ta yega na plabrashon kon nos ta yega na finalisashon i ki guia bo mester despues di esei. Esaki ta sosodé di komun akuerdo.