Trayekto di kuido

Kiko ta e pasonan?

Registrashon

Bo dòkter di kas por referí bo na un sikólogo òf sikiater, i kiko awó? Bo promé kontakto ku Yudaboyu ta konsistí di un kòmbersashon na momentu ku bo registrá. Den e kòmbersashon aki ta tuma bo informashonnan di kontakto. Ta eksigí e siguiente dokumentonan:

  • Karta di referensia di bo dòkter di kas.
  • Karchi di seguro bálido òf den kaso di seguro partikular un karta di garantia.

Si a base di e kòmbersashon durante registrashon tin indikashon pa mas investigashon i òf tratamentu, abo huntu ku bo mayor/persona ku ta kuida lo haña un intake ku un kolaborador di Yudaboyu.

  • Registrashon por digital via yudaboyu@ggz.cw.
  • Pa registrashon personal bo por pasa na Mohikanenweg 8.
    Djamars i djaweps, di 8’or pa 10.30 or di mainta.
  • Pa kasonan urgente bo por akudí semper na bo dòkter di kas.

Intake

Durante intake lo trata bo problema i kehonan. Huntu nos ta purba haña un bista kon bo ta funshoná na kas, skol òf den bo tempu liber. Parti di e intake ta yena e formularionan tokante bo desaroyo i repasá e lista di preguntanan ku abo, bo mayor/ persona ku ta kuida a yena. Despues di e intake por resultá ku ainda no ta muchu kla kiko ta pasando. E ora ei posiblemente bo ta haña análisis adishonal. Esakinan por enserá kòmbersashon, tèst i wega.

Tratamentu

Den un asina yamá kòmbersashon pa duna konseho e profeshonal ta deliberá ku bo i bo mayor/persona ku ta kuida kiko e tratamentu ta enserá. Nos ta registrá e palabrashonnan di e tratamentu i metanan di bo tratamentu den un plan di tratamentu.

Nos ta ofresé amplio tratamentunan poliklínika. Un seshon serka Yudaboyu por dura entre mei ora i un ora i mei. Den nos kuido ambulante nos ta ofresé tambe e posibilidat pa tratamentu den grupo i di famia.

 

 

Desaroyo

Durante e tratamentu ta kòmbersá tokante desaroyo. E profeshonal ku ta trata bo kaso ta deliberá ku bo i bo mayor/ persona ku ta kuida si e palabrashon i metanan ku a traha ta vigente ainda i òf si ta nesesario ahustá esakinan. Si tin kambio ta registrá e palabrashonnan nobo den e plan di tratamentu.

Evaluashon

Despues di e kantidat di seshon di tratamentu ku a palabrá ta sigui un evaluashon. Durante esaki abo huntu ku bo mayor/ persona ku ta kuida lo analisá si a realisá e metanan. For di e evaluashon aki por resultá lo siguiente:

  • Bo a logra bo metanan i por terminá e tratamentu.
  • Bo no a logra e metanan ainda. Nos tim lo duna e ora ei un konseho nobo. Esaki por enserá ku lo kontinuá ku bo tratamentu, ta ofresé bo un otro tratamentu òf ta referí bo na un otro instansia.