Oranjestad – Riba 29 di òktober 2021, e kuater GGZ organisashonnan di tur 6 isla den e parti Karibense di Reino a firma un akuerdo di kolaborashon pa mehorá e kalidat di kuido di salú mental pa komunidat Karibense. Ta trata di e fundashonnan Respaldo na Aruba, GGZ Curacao, Mental Health Foundation na Sint Maarten i Mental Health Caribbean na Boneiru, Saba i Statia.
Prinsipalmente COVID a kousa ku e preshon riba kuido di salú mental rònt mundu a oumentá. Pa e motibu aki e organisashonnan riba tur isla ta eksperensiá lista largu di espera, eskases di kapasidat, preshon finansiero i situashonnan ku ta empeorá serka klientenan. Pa forma un bos den Salu Mental pa tur isla e organisashonnan ta para mas fuerte huntu. E kolaborashon lo realisá interkambio di konosementu i ekspertisio organisatorio na bienestar di kalidat di kuido riba tur isla.
Ku e firmamentu aki lo sigui intensifiká e kolaborashon eksistente riba diferente área. E organisashonnan lo uni forsa prinsipalmente riba tereno di kalidat, lei i estudio. Pensa aki riba krea kursonan p’asina pone mas oportunidat di estudio (por ehèmpel pa enfermero sikiátriko) disponibel den region i por mantené talento na kas. Tambe por hasi uso optimal di e desaroyonan teknológiko den region manera E-health pa duna sosten na kuido.
“Manera Dutch Caribbean Hospital Alliance (koperashon entre e hòspitalnan di e 6 islanan) ta intentá, nos tambe lo traha duru pa mehorá e kalidat di kuido di salú mental. Den esaki nos lo inisiá ku gruponan di trabou konkreto riba tereno di kalidat, lei i formashon. E empleadonan di tur organisashon ta representá den e gruponan di trabou.” segun Erik Jansen direktor-gerente di Mental Health Caribbean. “Meta ta pa hasi mihó uso di e fasilidatnan i ekspertisio di otro. Komo organisashon nos no ta ekipá pa ofresé tur skala di tratamentu. E kolaborashon mester por hasi esaki mas fásil i efisiente.”
E direktor i gerentenan di e organisashonnan aki lo bini huntu djabièrnè mèrdia na Aruba den e oula di Universidat di Aruba pa firma e akuerdo. Minister di Hustisia i Asuntunan Sosial di Aruba Rocco Tjon, ku resientemente tin sikiatria tambe den su portafolio, lo habri e mèrdia ku un diskurso tokante importansia di salú mental i kolaborashon entre e islanan.
