Yudansa

Kiko por ta pasando?

Aki bo ta haña informashon tokante kehonan síkiko. No warda muchu largu. Tuma kontakto ku nos i huntu nos ta wak kiko ta pasando. Papia ta yuda.

Bo ta tristu kada bes? Bo dòkter òf sikólogo a bisa bo ku bo tin outismo? Òf bo ta pleita kada bes? Òf bo tin preshon den bo kabes? Riba Brainwiki bo ta haña informashon konfiabel tokante kehonan síkiko.

Brainwiki tei pa hóbennan i nan ambiente. Aki bo ta haña sa kiko bo por hasi si abo, un amigu òf un miembro di famia tin problema síkiko. I kon bo kompañeronan ta sinti nan mes. Tur informashon tokante e problemanan aki i tratamentu ku òf sin remedi ta pará aki den riba un rei kla i fásil pa manehá.

Esaki ta un website Hulandes. Na Yudaboyu nos ta komprondé ku na Kòrsou tin biaha e kosnan ta funshoná otro, pero tin algun problema ta tuma lugá rònt mundu. Pues abo no mester tin bèrgwensa pa esaki. Nos ta sòru pa bo haña yudansa ku ta pas ku bo.

Kua mayor òf persona ku ta kuida no ta prekupá pa su yunan tin biaha? Esaki ta masha normal. Pero kiko bo mester hasi si bo ta kere ku bo yu tin problema serio? Krese i eduká no tur ora ta fásil. Den desaroyo di mucha i hóbennan por surgi problema, por ehèmpel dor di un suseso ferfelu òf dor di predisposishon (aanleg).

Abo konosé bo yu mihó. Pues skucha bo intuishon bon. Pasombra abo ta e promé un ku ta mira e siñalnan ku bo yu ta duna. E ta kansá kada bes, ta bai malu na skol òf e ta reakshoná straño ku bo òf riba sierto situashon? No duda di buska yudansa.

Bo yu por ehèmpel por ta hopi reservá i tin problema ku kontakto sosial. Pero bo yu por ta hopi drùk i ta pèrdè konsentrashon masha lihé, pa kua motibu e no ta bai bon na skol. Tin bia un mucha por ta masha tristu òf tin miedu ora algu grave a tuma lugá den su bida. Òf bo yu ta rabia masha lihé. Por tin problema ku komportashon di bo yu.

Ora e problemanan sigui persistí pa largu tempu, ta bon pa atendé esaki ku bo dòkter di kas. Bo dòkter di kas huntu ku bo por husga kon serio esaki ta i referí bo na un sikólogo òf sikiater.

BrainWiki ta é website pa hóbennan ku problema síkiko. Aki bo por lesa kiko bo por hasi si abo, un amigu òf un miembro di famia tin problema síkiko.