Tratamentu klíniko

Mi no por hèndel na kas. Kiko awor?

Klínika Capriles ta ofresé un bon tratamentu klíniko pa malesanan sikiátriko i problemanan sikososial serio. Bo por pensa por ehèmpel na: kehonan sikótiko, bèsnan ku ta varia, estorbonan di personalidat, anshanan serio i depreshon pisá ku ta hasi ku bo no ta sali pafó mas, demensia i trastorno dor di dependensia i maluso di supstansianan narkótiko. Den un situashon asina ta konsehabel pa keda den e klínika, 24/7, 7 dia pa siman. Nus ta traha den estrecho kolaborashon ku médikonan ku ta referí i profeshonalnan de kuido pa salú menta pa yega na bon kuido.

E klínika ta brinda un ambiente sigur pa traha riba rekuperashon. Tim bia un atmishon temporal ta nesesario pa bin bèk den balans, Esaki ta sosodé solamente si ègt no por otro. Bo mes por tuma kontakto ku un dunadó di yudansa, pero un miembro di famia òf un persona mas yegá tambe mag yama klínika òf dòkter di kas. Miho kos ta pa tuma kontakto promé ku e situashon sali for di man.

Kon un atmishon ta bai?

Tin hende ta skohe pa un atmishon boluntario den Klínika capriles, otro ta keda atmití obligatoriamente. Tim bia ta trata di urgensia I un médiko ta disidí ku un atmishon ta nesesario. I tin bia ta wes ta dikta ku un kliente ku ta bou di kuratela mester di un time-out. E klínika ta traha hunt uku bon a kresementu i rekuperashon.

Mi ta skohe pa un atmishon boluntario.

Tin bia bo mester di un time-out pasó bo problemanan ta resultá persistente i bo mes no ta sali afó mas.Kon drástiko ku e por ta, un atmishon den klínika ta duna bo e oportunidat pa den un ambiente seif, traha riba bo rekuperashon. Si bo ta bai di akuerdo ku e proposishon pa atmishon, nos ta papia di un atmishon boluntario. Bo no ta ward ate ora tin un krísis serio, pero bo ta tuma kontakto ku bo dòkter di kas òf spesialista promé ku emergensia presentá.

Ta internámi obligá.

Un intervenshon di krísis por kondusí na un atmishon imboluntario. Esaki ta sosodé solamente den kaso ku bo ta forma un peliger pa bo mes òf pa otronan. Un atmishon oblige no por asin’asina. Tin un prosedura konsiensudo ku ta ankrá den lei. Intenshon ta ku, mas lihé posibel, bo bira un poko mas trankil atrobe (stabilisá ta yama esei) i ta siña haña un balans nobo. Ora bo ta stabil atrobe, ta hasi palabrashonnan ku bo tokante kon sigui I bo plan di tratamentu.

Mi mester di yudansa purá. Krísis!

Si un dòkter ta haña ku intervenshon imediato ta nesesario, e ta papia di un intervenshon di krísis. E por intervení den un krísis kaminda bo ta trastorná òf por ehèmpel agresivo. Por ta ta bira violento riba kaya òf na kas i mester yama polis. E peliger akí por ta pa esun konserní mes tambe, manera den kaso di un posibel matamentu di kurpa òf un sikósis. Warda te ora por ehèmpel e dòkter di kas tin ora di konsulta no por e or’ei. E intervenshon di krísis mes tin bia ta duna sufisiente solushon, pero hopi bia ta un fase di transishon pa kuido regular.

Mi ta bou di kuratela.

Ora bo ta bou di kuratela, ta deklará bo ‘inkapas na aktua’. Esaki ta nifiká ku bo mes no mag tuma desishonnan práktiko sin permit di bo kuratòr. Ounke un hende ta 18 aña bai ariba, pa por ehèmpel sera un kontrakt di kompra òf hür, mester di permit di su kuratòr. Meta di kuratela ta pa protehá e persona konserní riba tereno personal i finansiero. E prosedura akí ta ankrá den lei.

Kon ta bai na yegada?

E prosedura ta masha simple riba e promé dia. E hendenan di Klínika Capriles t’ei pa yuda bo. Ora atmití bo den Klínika Capriles, e dunadó di tratamentu ta splika bo kòrtiku e prosedura. Riba e dia ei mes bo tin un intake, un kombersashon di atmishon ku e dunadó di tratamentu (sikiater òf sikólogo) i un enfermera/bruder. Den kaso ku bo dunadó di tratamentu no ta un sikiater, lo bo hiba un kombersashon ku e sikiater di e departamentu tambe.

Kiko ta sosodé durante un tratamentu?

Diagnostiká I traha plan di tratamentu

Huntu ku bo dunadó di tratamentu bo ta traha un plan di tratamentu. E plan akí ta kontené e loke boso palabrá tokante bo tratamentu. Esaki bo ta hasi en prinsipio huntu. Bo por enbolbí bo famia tambe. Pa por traha un plan, abo i bo dunadó di tratamentu mester yega na un akuerdo tokante kiko ta e kehonan. Tin bia mester di investigashonnan pa yega na un diagnosis (temporal). Ta importante pa boso ta di akuerdo ku otro tokante kiko ta e motibunan di bo kehonan.

Konkordá meta i espektativanan

Despues ta determiná huntu kiko ta e metanan ku bo ke logra i di ki manera bo dunadó di tratamentu i abo ta bai realisá esaki. Bo ta palabra tambe na ki momentu i kon ta finalisá bo tratamentu. Esaki ta importante, pa asina e espektativanan no ta muchu haltu ni muchu abou. Ta laf si abo ta kere ku mester di 10 kombersashon, i bo dunadó di tratamentu ta kalkulá ku mester di 20.

Sigui tratamentu

Parti di un plan di tratamentu por ta por ehèmpel: terapia individual i den grupo, den kombinashon ku terapia di músika. Ta difísil pa tur hende pa kambia nan estilo di bida, pensamentunan òf komportashon. P’esei un tratamentu ta tuma tempu, pero bo por tin benifisio di dje pa bida largu.E plan akí mester ta ofisialmente akordá dor di abo i bo dunadó di tratamentu promé ku bo tratamentu por kuminsá.

Evaluá

Ta evaluá e tratamentu ku regularidat. Durante e evaluashonnan bo ta deliberá ku bo dunadó di tratamentu i otronan kon e tratamentu ta kanando. Ta deliberá bo plan tambe den e grupo di tratamentu di tur e dunadonan di kuido enbolbí.

Tratamentu ta kla

Na momentu ku bo a rekuperá di tal forma ku bo por bai ku retiro for di e klínika, ta kasi tur loke ta nesesario pa organisá esaki. Komo aktividatnan ku tin ku entamá pa por laga bo bai kas, bo por pensa na:

  • pone bo famia na altura di e fecha di retiro,
  • prepará preskripshon pa remedy pa un botika den bo bisendario, i
  • regla eventual poskuido. Bo mes por indiká ora bo ke keda den poskuido, klínika ta regla esaki e or’ei.

Ki ora bo por haña retiro ta depende kompletamente di bo progreso durante e periodo di atmishon. Esaki ta diferente pa kada persona. Nos ta trata na no laga hende keda mas largu ku nesesario – kuido no ta barata I un kliente ku a rekuperá por bai kas bèk òf por ehèmpel un forma di bibienda ahustá.Na mes momentu nos ke tin sigur sí ku hendenan ta basta firme pará den nan sapatu ora nan bai kas, i por keda den balans riba nan mes. Ku poskuido nos ta purba di prevení ku kos ta bai robes lihé despues di sali for di klínika.

Kiko ta pasa den kaso di un rekaida?

Un rekaida ta fèrfelu pa tur hende. Sinembargo, durante e proseso di rekuperashon ta normal ku bo por enfrentá momentunan bon i tambe ménos bon. Si bo haña rekaida, nos lo bolbe kuminsá mésora bèk ku e tratamentu pa asina sòru ku bo ta bai bèk den un mihó estado mas lihé ku ta posibel. Tin bia un par di kombersashon ta sufisiente, tin bia un atmishon kòrtiku ta nesesario pa lanta bèk. Ta prudente pa komo kliente òf famia/amigu/bisiña hala atenshon si no ta bayendo bon i no laga un dep fuerte, ansha paralisante òf situashon fèrfelu sali for di man. Pa pidi yudansa tin bia por ta difísil, pero sa ku esaki lo ta e mihó desishon.