Ken nos ta?

Den e tratamentu i guia ku Klínika Capriles ta brinda su klientenan, e ta dirigí su mes riba mantenshon, rekuperashon i promoshon di kalidat di bida di personanan ku problema mental.
Den nos trabou nos ta laga e siguiente ponensia guia nos:

Huntu traha na kresementu i rekuperashon

Traha huntu

Ku ‘traha huntu’ nos ta referí na e manera ku nos ta traha ku e kliente na su rekuperashon. Den e tratamentu i guia nos ta busku huntu ku e kliente í su ret, un mihó konekshon posibel ku su deseo i nesesidatnan.

Hasiendo esaki, nos trahadónan ta para banda di e kliente, sin disidí p’é kiko e mester hasi. E dunadónan di yudansa rondó di e kliente ta traha interdisiplinario. Ta enbolbí famia i otro pilánan di sosten den e ret di e kliente den e tratamentu i guia.

Kresementu

Nos ta wak e hende kompleto i no solamente su limitashon i problemanan. Nos ta sali for di loke hende por. Nos ta ofresé un kliente e chèns pa usa i desaroyá su talentonan. Fortifiká e propio forsanan di e kliente ta para sentral. Ta mira esaki den e afán pa un bida mas independiente i ful pa e kliente, i un partisipashon mas optimal posibel na komunidat.

Rekuperashon

E sosten ku nos ta brinda na un kliente ku problemanan síkiko ta na promé instante dirigí riba rekuperashon. Rekuperashon ta e dunamentu di sentido i nifikashon nobo na bida, despues ku a surgi problemanan síkiko i no semper ta méskos ku kurashon. E historia propio di e kliente ta para sentral. Ta e por indiká kiko rekuperashon ta nifiká p’é i kon e ke realisá esaki. Huntu e kliente i dunadó di tratamentu ta deliberá kon ta logra e metanan akí

1. Komo parti di GGz Curaçao, Klínika Capriles ta dirigí su mes ku su formanan di tratamentu ambulante i klíniko riba mantenshon i rekuperashon di kalidat di bida di hende ku problema sikiátriko. Meta ta pa sostené hendenan ku problema sikiátriko di tal forma  ku nan por eksperensiá nan bida komo felis i ku sentido atrobe. E kliente ta sentral. Nos método di rehabilitashon ta yuda e kliente investigá su deseo i posibilidatnan riba tereno di biba, traha, siñan, tempu liber i kontaktonan sosial.
2. Klínika Capriles ta traha estrechamente huntu ku tur stakeholder. Bou di stakeholder nos ta komprondé hendenan den e ret sosial di e kliente, manera dòkter di kas, hospital, tin bia hustisia i polis, i otro proveedónan di kuido ku kual e kliente tin of por bai tin di aber kuné. Nos ta para pa un aserkamentu di kuido integral, den kual stakeholders ta hasi palabrashon tokante e metanan aspirá pa un kliente.
3. Klínika Caprilesta un hospital sikiátriko general. Klínika Capriles a spesialisá su mes den tratamentu di sierto gruponan di kliente. Aki por pensa por ehèmpel tratamentu di hendenan ku sikósis. Otro gruponan importante ta mayornan di edat, adiktonan i hendenan ku un limitashon mental. Ta apliká e konosementu i eksperensia tantu ambulatorio (den ambiente di kas) komo klíniko (ora di tratementu den klínika). Nos ta kompartí nos ekspertisio ku institushonnan manera Fundashon Verriet, Stichting Birgen di Rosario, Fundashon pa Maneho di Adikshon i Mental Health Caribbean (Bonèiru).
4. Na su lokalidat Klínika Capriles ta brinda kuido forénsiko ku un nivel di seguridat 2. Klientenan ku ta bin na remarke pa kuido ku un nivel di seguridat 3 òf mas, lo trata den futuro pafó di e tereno di Klínika Capriles. Esaki ta sosodé den un setting será den kual e libertat di moveshon di e kliente ta limitá. Un tratamentu por kuminsá einan òf sigui si e kliente ta kapas.
5. Ta amplia fasilidatnan ambulante ku e meta pa mas tantu posibel trata hende na nan propio kas. E warda di krísis por ehèmpel ta duna ayudo na hendenan den emergensia sikiátriko, ku e meta pa evitá un atmishon den klínika. A redusí e kantidat di kama pa adulto na un mínimo sosialmente aseptabel. Esei ta sufisiente pa kumpli ku e demanda for di komunidat.
6. Ta duna e klientenan atmití tratamentu den un ‘ambiente kurativo’ ku ta kontribuí positivamente na e rekuperashon. E edifisionan i terenonan ta di tal forma ekipá ku ta reina un esfera relahante i agradabel.Un enbolbimientu aktivo di famia i komunidat tambe ta forma parti di e ambiente kurativo akí.
7. Banda di un ambiente kurativo, mester di un ‘kultura sigur’. Kolaboradónan ta traha huntu na un kultura den kual tur hende, trahadónan i klientenan, por sinti nan mes sigur. P’esei trahadónan ta wak nan manera di traha krítikamente. Nan ta hasi situashonnan insigur ku por papia di  dje i huntu ku otro ta  siña kon por mihó. Klientenan por konfia ku nan ta den bon man. Seguridat ta un kondishon importante pa klientenan por rekuperá i krese.
8.  

Klínika Capriles ta manehá un kompas étiko ku ta duna rumbo na e manera kon nos ta traha. E kompas akí ta enserá tres balor núkleo ku ta den liña ku nos vishon i ta yuda realisá nos metanan. Esakinan ta balornan núkleo di GGz Curaçao tambe.

Kompromiso

Nos ta komprometé na klientenan, koleganan i komunidat. Saliendo for di un sintimentu di union i igualdat, nos ta kontribuí na e mishon di GGz Curaçao.

Kapasidat

Nos ta kapasitá den nos profeshon. Kliente i koleganan sa kiko nan mag di spera di nos. I nos ta siña kontinuamente pa tene nos konosementu na nivel.

Konfiabilidat

Nos ta konfiabel. Palabra ta palabra. Nos ta hasi loke kliente i koleganan mag di spera di nos.